ਗੁਰੂ ਪਿਆਰਿਉ,
ਵਾਹਿਗੁਰੂ ਜੀ ਕਾ ਖ਼ਾਲਸਾ, ਵਾਹਿਗੁਰੂ ਜੀ ਕੀ ਫ਼ਤਿਹ॥
ਭਾਈ ਸਾਹਿਬ ਜੋਗਿੰਦਰ ਸਿੰਘ ਜੀ ਤਲਵਾੜਾ ਵਲੋਂ ਪ੍ਰਕਾਸ਼ਿਤ ਸਟੀਕ ਵਿਚੋਂ ਆਪ ਜੀ ਦੀ ਖਿਦਮਤ ਵਿਚ ਪੇਸ਼ ਹੈ 'ਬੇਨਤੀ ਚੌਪਈ' ਉਚਾਰਣ-ਬੋਧ। ਕਈ ਜਗ੍ਹਾ ਦਾਸ ਨੇ ਕੁੱਝ ਇਕ ਐਡਿਟ ਪੋਸਟਿੰਗ ਦੀ ਲੋੜ ਅਨੁਸਾਰ ਕੀਤੇ ਹਨ। ਉਚਾਰਨ-ਬੋਧ ਪੜਨ ਤੋਂ ਪਹਿਲਾ ਨੋਟ ਜਰੂਰ ਪੜ ਲੈਣੇ ਜੀ। ਭਾਈ ਕੁਲਬੀਰ ਸਿੰਘ ਜੀਉ ਜਿਥੇ ਗਲਤੀ ਲੱਗੇ ਸੋਧ ਕਰ ਦੇਣੀ ਜੀ।
ਬੇਨਤੀ ਚੌਪਈ
ਨੋਟ ੧: ਵਿਸ਼ੇਸ਼ ਧੁਨੀ-ਪੰਜਾਬੀ ਦੇ ਅੱਖਰ ਸ ਦੀਆਂ ਦੋ ਧੁਨੀਆਂ ਹਨ। ਇੱਕ ਮੂਲ ਧੁਨੀ ਹੈ, ਪਰ ਦੂਜੀ ‘ਵਿਸ਼ੇਸ਼ ਧੁਨੀ’ ਨੂੰ ਦਰਸਾਉਣ ਲਈ ਅੱਜ-ਕੱਲ੍ਹ ਦੀ ਪੰਜਾਬੀ ਲਿੱਪੀ ਵਿਚ ਅੱਖਰ ਦੇ ਥੱਲੇ ਬਿੰਦੀ ਦੀ ਵਰਤੋਂ ਕੀਤੀ ਜਾਦੀ ਹੈ (ਸ਼)।
ਨੋਟ ੨: ਤੁਕਾਂ ਵਿਚ ਅਰਧ-ਬਿਸ੍ਰਾਮ ਲਈ ਚਿੰਨ੍ਹ ਕਉਮਾ ‘,’ ਲਾਇਆ ਗਿਆ ਹੈ, ਪਰ ਜਿਹੜੀ ਤੁਕ ਵਿਚ ਅਰਥ-ਭਾਵ ਨੂੰ ਵਧੇਰੇ ਸਪਸ਼ਟ ਕਰਨ ਲਈ ਹੋਰ ਬਿਸ੍ਰਾਮ ਹੀ ਲੋੜ ਪਈ ਹੈ, ਓਥੇ ਚਿੰਨ੍ਹ ਸੈਮੀਕੋਲਨ ‘;’ ਲਾਇਆ ਗਿਆ ਹੈ।
ੴਵਾਹਿਗੁਰੂ ਜੀ ਕੀ ਫ਼ਤਿਹ॥
ਪਾ: ੧੦(ਪਾ:-ਉਚਾਰਣ ਪਾਤਿਸ਼ਾਹੀ, ੧੦-ਉਚਾਰਣ ਦਸਵੀਂ।)
ਕਬਿਯੋ ਬਾਚ(ਕਬਿਯੋ-ਉਚਾਰਣ ਕਬੀਓ।)
ਬੇਨਤੀ ॥
ਚੌਪਈ ॥
ਹਮਰੀ ਕਰੋ ਹਾਥ ਦੈ ਰੱਛਾ ॥(ਦੈ-ਦੋਲਾਵਾਂ ਦਾ ਉਚਾਰਣ ਕਰਨਾ ਹੈ, ਲਾਂਵ ਦਾ ਨਹੀਂ।)
ਪੂਰਨ ਹੋਇ ਚਿਤ ਕੀ ਇੱਛਾ ॥
ਤਵ ਚਰਨਨ ਮਨ ਰਹੈ ਹਮਾਰਾ ॥
ਅਪਨਾ ਜਾਨ ਕਰੋ ਪ੍ਰਤਿਪਾਰਾ ॥੧॥(ਪ੍ਰਤਿਪਾਰਾ-‘’ਿ ਦਾ ਉਚਾਰਣ ‘ਤ’ ਨਾਲ ਹੈ, ‘ਪ੍ਰ’ ਨਾਲ ਨਹੀਂ।)
ਹਮਰੇ ਦੁਸਟ ਸਭੈ ਤੁਮ ਘਾਵਹੁ ॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਆਪੁ ਹਾਥ ਦੈ ਮੋਹਿ ਬਚਾਵਹੁ ॥
ਸੁਖੀ ਬਸੈ ਮੋਰੋ ਪਰਿਵਾਰਾ ॥
ਸੇਵਕ ਸਿੱਖ ਸਭੈ ਕਰਤਾਰਾ ॥੨॥
ਮੋ ਰੱਛਾ ਨਿਜ ਕਰ ਦੈ ਕਰਿਯੈ ॥
ਸਭ ਬੈਰਨ ਕੋ ਆਜ ਸੰਘਰਿਯੈ ॥(ਸੰਘਰਿਯੈ-ਉਚਾਰਣ ਸੰਘੱਰੀਐ।)
ਪੂਰਨ ਹੋਇ ਹਮਾਰੀ ਆਸਾ ॥
ਤੋਰ ਭਜਨ ਕੀ ਰਹੈ ਪਿਆਸਾ ॥੩॥
ਤੁਮਹਿ ਛਾਡਿ ਕੋਈ ਅਵਰੁ ਨ ਧਿਯਾਊਂ ॥(ਧਿਯਾਊਂ-ਉਚਾਰਣ ਧਿਆਊਂ।)
ਜੋ ਬਰ ਚਹੋਂ ਸੁ ਤੁਮ ਤੇ ਪਾਊਂ ॥
ਸੇਵਕ; ਸਿੱਖ ਹਮਾਰੇ ਤਾਰੀਅਹਿ ॥(ਤਾਰੀਅਹਿ-ਅੰਤਲੇ ਸ੍ਵਰ ਦਾ ਉਚਾਰਨ ਨਾਸਕੀ।)
ਚੁਨਿ ਚੁਨਿ ਸਤ੍ਰ ਹਮਾਰੇ ਮਾਰੀਅਹਿ ॥੪॥(ਮਾਰੀਅਹਿ- ਅੰਤਲੇ ਸ੍ਵਰ ਦਾ ਉਚਾਰਨ ਨਾਸਕੀ।)
ਆਪ ਹਾਥ ਦੈ ਮੁਝੈ ਉਬਰਿਯੈ ॥(ਉਬਰਿਐ-ਉਚਾਰਣ ਉਬੱਰੀਐ।)
ਮਰਨ ਕਾਲ ਕਾ ਤ੍ਰਾਸ ਨਿਵਰਿਯੈ ॥(ਨਿਵਰਯੈ-ਉਚਾਰਣ ਨਿਵੱਰੀਐ)
ਹੂਜੋ ਸਦਾ ਹਮਾਰੇ ਪੱਛਾ ॥
ਸ੍ਰੀ ਅਸਿਧੁਜ ਜੂ ਕਰਿਯਹੁ ਰੱਛਾ ॥੫॥(ਕਰਿਯਹੁ-ਉਚਾਰਣ ਕਰੀਅਹੁ।)
ਰਾਖਿ ਲੇਹੁ ਮੁਹਿ ਰਾਖਨਹਾਰੇ ॥
ਸਾਹਿਬ; ਸੰਤ ਸਹਾਇ; ਪਿਯਾਰੇ ॥(ਪਿਯਾਰੇ-ਉਚਾਰਣ ਪਿਆਰੇ।)
ਦੀਨ ਬੰਧੁ; ਦੁਸਟਨ ਕੇ ਹੰਤਾ ॥(ਦੁਸਟਨ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਤੁਮ ਹੋ, ਪੁਰੀ ਚਤੁਰ ਦਸ ਕੰਤਾ ॥੬॥(ਚਤੁਰ-ਦਸ - ਇਹ ਸਮਾਸੀ ਸ਼ਬਦ ਹੈ, ਉਚਾਰਣ ਇਕੱਠਾ।)
ਕਾਲ ਪਾਇ ਬ੍ਰਹਮਾ ਬਪੁ ਧਰਾ ॥
ਕਾਲ ਪਾਇ ਸਿਵ ਜੂ ਅਵਤਰਾ ॥(ਸਿਵ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਕਾਲ ਪਾਇ ਕਰ ਬਿਸਨੁ ਪ੍ਰਕਾਸਾ ॥(ਬਿਸਨ, ਪ੍ਰਕਾਸਾ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਸਕਲ ਕਾਲ ਕਾ ਕੀਆ ਤਮਾਸਾ ॥੭॥(ਤਮਾਸਾ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਜਵਨ ਕਾਲ ਜੋਗੀ ਸਿਵ ਕੀਓ ॥(ਸਿਵ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਬੇਦ ਰਾਜ ਬ੍ਰਹਮਾ ਜੂ ਥੀਓ ॥(ਬੇਦ-ਰਾਜ - ਸਮਾਸੀ ਸ਼ਬਦ ਹੈ, ਉਚਾਰਣ ਇਕੱਠਾ।)
ਜਵਨ ਕਾਲ ਸਭ ਲੋਕ ਸਵਾਰਾ ॥
ਨਮਸਕਾਰ ਹੈ ਤਾਹਿ ਹਮਾਰਾ ॥੮॥(ਤਾਹਿ-ਉਚਾਰਣ ਨਾਸਕਿਤਾ ਬਿਨਾ।)
ਜਵਨ ਕਾਲ ਸਭ ਜਗਤ ਬਨਾਯੋ ॥(ਬਨਾਯੋ-ਉਚਾਰਣ ਬਨਾਇਓ।)
ਦੇਵ; ਦੈਤ; ਜੱਛਨ ਉਪਜਾਯੋ ॥(ਉਪਜਾਯੋ-ਉਚਾਰਣ ਉਪਜਾਇਓ, ਦੈਤ-‘ਦੈ’ ਉਚਾਰਣ ਨਾਸਕੀ।)
ਆਦਿ ਅੰਤਿ ਏਕੈ ਅਵਤਾਰਾ ॥
ਸੋਈ ਗੁਰੂ ਸਮਝਿਯਹੁ ਹਮਾਰਾ ॥੯॥(ਸਮਝਿਯਹੁ-ਉਚਾਰਣ ਸਮਝੀਅਹੁ।)
ਨਮਸਕਾਰ ਤਿਸ ਹੀ ਕੋ ਹਮਾਰੀ ॥
ਸਕਲ ਪ੍ਰਜਾ ਜਿਨ ਆਪ ਸਵਾਰੀ ॥(ਪ੍ਰਜਾ-ਦੁੱਤ ਅੱਖਰ ‘ਰ’ ਦਾ ਉਚਾਰਣ ਮੂਲ ਅੱਖਰ ‘ਪ’ ਨਾਲ ਮਿਲਵਾਂ ਭਾਵ ਪਰਜਾ ਨਹੀ।)
ਸਿਵਕਨ ਕੋ ਸਿਵ ਗੁਨ ਸੁਖ ਦੀਓ ॥(ਸਿਵ-ਗੁਨ - ਸਮਾਸੀ ਸ਼ਬਦ ਹੈ, ਉਚਾਰਣ ਇਕੱਠਾ। ਇੱਥੇ ਸਿਵਕਨ ਦਾ ਅਰਥ ‘ਸੇਵਕਾਂ ਨੂੰ’ ਅਤੇ ਸਿਵ ਦਾ ਅਰਥ ‘ਦੈਵੀ ਗੁਣ’ ਹੈ।)
ਸਤ੍ਰੁੱਨ ਕੋ ਪਲ ਮੋ ਬਧ ਕੀਓ ॥੧੦॥(ਸਤ੍ਰੁੱਨ-‘ਤ੍ਰੁ’ ਔਕੁੜ ਦੀ ਧੁਨੀ ਦਾ ਉਚਾਰਣ ਛੱਡਣਾ ਨਹੀਂ।)
ਘਟ ਘਟ ਕੇ ਅੰਤਰ ਕੀ ਜਾਨਤ ॥
ਭਲੇ ਬੁਰੇ ਕੀ ਪੀਰ ਪਛਾਨਤ ॥
ਚੀਟੀ ਤੇ ਕੁੰਚਰ ਅਸਥੂਲਾ ॥(ਚੀਟੀ-‘ਚੀ’ ਨਾਸਕੀ ਉਚਾਰਣ ਅਸ਼ੁੱਧ ਹੈ।)
ਸਭ ਪਰ ਕ੍ਰਿਪਾ ਦ੍ਰਿਸਟਿ ਕਰ ਫੂਲਾ ॥੧੧॥
ਸੰਤਨ ਦੁਖ ਪਾਏ ਤੇ; ਦੁਖੀ ॥
ਸੁਖ ਪਾਏ ਸਾਧੁਨ ਕੇ ਸੁਖੀ ॥
ਏਕ ਏਕ ਕੀ ਪੀਰ ਪਛਾਨੈਂ ॥
ਘਟ ਘਟ ਕੇ ਪਟ ਪਟ ਕੀ ਜਾਨੈਂ ॥੧੨॥
ਜਬ ਉਦਕਰਖ ਕਰਾ ਕਰਤਾਰਾ ॥
ਪ੍ਰਜਾ ਧਰਤ ਤਬ ਦੇਹ ਅਪਾਰਾ ॥(ਪ੍ਰਜਾ-ਦੁੱਤ ਅੱਖਰ ‘ਰ’ ਦਾ ਉਚਾਰਣ ਮੂਲ ਅੱਖਰ ‘ਪ’ ਨਾਲ ਮਿਲਵਾਂ, ਪਰਜਾ ਉਚਾਰਣ ਕਰਨਾ ਅਸ਼ੁੱਧ ਹੈ।)
ਜਬ ਆਕਰਖ ਕਰਤ ਹੋ ਕਬਹੂੰ ॥
ਤੁਮ ਮੈ ਮਿਲਤ ਦੇਹ ਧਰ ਸਭਹੂੰ ॥੧੩॥(ਦੇਹ-ਧਰ - ਸਮਾਸੀ ਸ਼ਬਦ, ਉਚਾਰਣ ਇਕੱਠਾ।)
ਜੇਤੇ ਬਦਨ ਸ੍ਰਿਸਟਿ ਸਭ ਧਾਰੈ ॥(ਸ੍ਰਿਸਟਿ-ਵਿਚਕਾਰਲਾ ‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਆਪੁ ਆਪਨੀ ਬੂਝ ਉਚਾਰੈ ॥
ਤੁਮ ਸਭਹੀ ਤੇ ਰਹਤ ਨਿਰਾਲਮ ॥
ਜਾਨਤ ਬੇਦ ਭੇਦ ਅਰ ਆਲਮ ॥੧੪॥
ਨਿਰੰਕਾਰ; ਨ੍ਰਿਬਿਕਾਰ; ਨਿਰਲੰਭ ॥(ਨ੍ਰਿਬਿਕਾਰ-ਮੁਢਲੀ ‘’ਿ ਦਾ ਉਚਾਰਣ ਪੈਰ-ਚਿੰਨ੍ਹ ਅੱਖਰ ‘ਰ’ ਨਾਲ। ਨਿਰਬਿਕਾਰ ਪੜਨਾ ਅਸ਼ੁੱਧ ਹੈ।)
ਆਦਿ; ਅਨੀਲ; ਅਨਾਦਿ; ਅਸੰਭ ॥
ਤਾ ਕਾ ਮੂੜ੍ਹ ਉਚਾਰਤ ਭੇਦਾ ॥(ਤਾ-(ਪੜਨਾਉਂ) ਉਚਾਰਣ ਨਾਸਿਕਤਾ ਬਿਨਾ।)
ਜਾ ਕੌ ਭੇਵ ਨ ਪਾਵਤ ਬੇਦਾ ॥੧੫॥(ਜਾ-(ਪੜਨਾਉਂ) ਉਚਾਰਣ ਨਾਸਿਕਤਾ ਬਿਨਾ।)
ਤਾ ਕੌ ਕਰਿ ਪਾਹਨ ਅਨੁਮਾਨਤ ॥(ਤਾ-ਉਚਾਰਣ ਨਾਸਿਕਤਾ ਬਿਨਾ। ਅਨੁਮਾਨਤ-‘ਨੁ’ ਔਂਕੜ ਛੱਡਣਾ ਨਹੀਂ।)
ਮਹਾ ਮੂੜ੍ਹ ਕਛੁ ਭੇਦ ਨ ਜਾਨਤ ॥
ਮਹਾਦੇਵ ਕੋ ਕਹਤ ਸਦਾ ਸਿਵ ॥(ਸਦਾ-ਸਿਵ - ਸਮਾਸੀ ਸ਼ਬਦ, ਉਚਾਰਣ ਇਕੱਠਾ। ਸਿਵ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਨਿਰੰਕਾਰ ਕਾ ਚੀਨਤ ਨਹਿ ਭਿਵ ॥੧੬॥
ਆਪੁ ਆਪਨੀ ਬੁਧਿ ਹੈ ਜੇਤੀ ॥
ਬਰਨਤ ਭਿੰਨ ਭਿੰਨ ਤੁਹਿ ਤੇਤੀ ॥
ਤੁਮਰਾ ਲਖਾ ਨ ਜਾਇ ਪਸਾਰਾ ॥
ਕਿਹ ਬਿਧਿ ਸਜਾ ਪ੍ਰਥਮ ਸੰਸਾਰਾ ॥੧੭॥
ਏਕੈ ਰੂਪ ਅਨੂਪ ਸਰੂਪਾ ॥
ਰੰਕ ਭਯੋ, ਰਾਵ; ਕਹੀ ਭੂਪਾ ॥(ਭਯੋ-ਉਚਾਰਣ ‘ਭਇਓ’। ਕਹੀ-‘ਹੀ’ ਉਚਾਰਣ ਨਾਸਕੀ।)
ਅੰਡਜ; ਜੇਰਜ; ਸੇਤਜ ਕੀਨੀ ॥
ਉਤਭੁਜ ਖਾਨਿ ਬਹੁਰ ਰਚਿ ਦੀਨੀ ॥੧੮॥
ਕਹੂੰ; ਫੂਲ ਰਾਜਾ ਹ੍ਵੈ ਬੈਠਾ ॥(ਫੂਲ-ਰਾਜਾ - ਸਮਾਸੀ ਸ਼ਬਦ, ਉਚਾਰਣ ਇਕੱਠਾ।ਹ੍ਵੈ-ਉਚਾਰਣ ਹੁਐ।)
ਕਹੂੰ ਸਿਮਟਿ ਭ੍ਯਿੋ ਸੰਕਰ ਇਕੈਠਾ ॥(ਭ੍ਯਿੋ-ੳਚਾਰਣ ਭਇਓ। ਸੰਕਰ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਸਗਰੀ ਸ੍ਰਿਸਟਿ ਦਿਖਾਇ ਅਚੰਭਵ ॥
ਆਦਿ ਜੁਗਾਦਿ ਸਰੂਪ ਸੁਯੰਭਵ ॥੧੯॥(ਸੁਯੰਭਵ-ਉਚਾਰਣ ਸੁਅੰਭਵ।)
ਅਬ ਰੱਛਾ ਮੇਰੀ ਤੁਮ ਕਰੋ ॥
ਸਿੱਖ ਉਬਾਰਿ ਅਸਿੱਖ ਸੰਘਰੋ ॥(ਸੰਘਰੋ-ਉਚਾਰਣ ਸੰ-ਘਰੋ।)
ਦੁਸਟ ਜਿਤੇ ਉਠਵਤ ਉਤਪਾਤਾ ॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਸਕਲ ਮਲੇਛ ਕਰੋ ਰਣ ਘਾਤਾ ॥੨੦॥
ਜੇ; ਅਸਿਧੁਜ! ਤਵ ਸਰਨੀ ਪਰੇ ॥
ਤਿਨ ਕੇ ਦੁਸਟ ਦੁਖਿਤ ਹ੍ਵੈ ਮਰੇ ॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ। ਦੁਖਿਤ-‘ਖਿ’ ਸਿਹਾਰੀ ਦਾ ਉਚਾਰਣ ਛੱਡਣਾ ਨਹੀਂ। ਹ੍ਵੈ-ਉਚਾਰਣ ਹੁਐ।)
ਪੁਰਖ ਜਵਨ ਪਗ ਪਰੇ ਤਿਹਾਰੇ ॥
ਤਿਨ ਕੇ ਤੁਮ ਸੰਕਟ ਸਭ ਟਾਰੇ ॥੨੧॥
ਜੋ ਕਲਿ ਕੋ ਇਕ ਬਾਰ ਧਿਐ ਹੈ ॥
ਤਾ ਕੇ ਕਾਲ ਨਿਕਟਿ ਨਹਿ ਐ ਹੈ ॥
ਰੱਛਾ ਹੋਇ ਤਾਹਿ ਸਭ ਕਾਲਾ ॥(ਤਾਹਿ-(ਪੜਨਾਉਂ) ਉਚਾਰਣ ਨਾਸਿਕਤਾ ਬਿਨਾ।)
ਦੁਸਟ ਅਰਿਸਟ ਟਰੇਂ ਤਤਕਾਲਾ ॥੨੨॥(ਦੁਸਟ, ਅਰਿਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਕ੍ਰਿਪਾ ਦ੍ਰਿਸਟਿ ਤਨ ਜਾਹਿ ਨਿਹਰਿਹੋ ॥(ਕ੍ਰਿਪਾ-ਸਿਹਾਰੀ ਸਹਿਤ ਪੈਰ ‘ਰ’ ਦਾ ਉਚਾਰਣ ‘ਕ’ ਦੀ ਧੁਨੀ ਨਾਲ ਮਿਲਵਾਂ। ਦ੍ਰਿਸਟਿ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ। ਨਿਹਰਿਹੋ-ਨਿਹਾਰਿਹੋ ਦਾ ਸੰਖਿਪਤ ਰੂਪ। ਜਾਹਿ-ਉਚਾਰਣ ਨਾਸਿਕਤਾ ਬਿਨਾ।)
ਕੇ ਤਾਪ ਤਨਕ ਮੋ ਹਰਿਹੋ ॥(ਤਾ-(ਪੜਨਾਉਂ) ਉਚਾਰਣ ਨਾਸਿਕਤਾ ਬਿਨਾ।)
ਰਿੱਧਿ ਸਿੱਧਿ ਘਰ ਮੋ ਸਭ ਹੋਈ ॥
ਦੁਸਟ ਛਾਹ ਛ੍ਵੈ ਸਕੈ ਨ ਕੋਈ ॥੨੩॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ। ਛ੍ਵੈ-ਉਚਾਰਣ ਛੁਐ।)
ਏਕ ਬਾਰ ਜਿਨ ਤੁਮੈ ਸੰਭਾਰਾ ॥
ਕਾਲ ਫਾਸ ਤੇ ਤਾਹਿ ਉਬਾਰਾ ॥(ਤਾਹਿ-ਉਚਾਰਣ ਨਾਸਿਕਤਾ ਬਿਨਾ।)
ਜਿਨ ਨਰ ਨਾਮ ਤਿਹਾਰੋ ਕਹਾ ॥
ਦਾਰਿਦ ਦੁਸਟ ਦੋਖ ਤੇ ਰਹਾ ॥੨੪॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਖੜਗ ਕੇਤ; ਮੈ ਸਰਣਿ ਤਿਹਾਰੀ ॥(ਖੜਗ-ਕੇਤ - ਸਮਾਸੀ ਸ਼ਬਦ, ਉਚਾਰਣ ਇਕੱਠਾ।)
ਆਪ ਹਾਥ ਦੈ ਲੇਹੁ ਉਬਾਰੀ ॥(ਦੈ-ਦੁਲਾਵਾਂ ਦਾ ਉਚਾਰਣ ਕਰਨਾ ਹੈ, ਲਾਂਵ ਦਾ ਨਹੀਂ।)
ਸਰਬ ਠੌਰ ਮੋ ਹੋਹੁ ਸਹਾਈ ॥
ਦੁਸਟ ਦੋਖ ਤੇ ਲੇਹੁ ਬਚਾਈ ॥੨੫॥(ਦੁਸਟ-‘ਸ’ ਉਚਾਰਣ ਵਿਸ਼ੇਸ਼ ਧੁਨੀ।)
ਆਸ ਹੈ ਕਿ ਅੰਮ੍ਰਿਤ ਬਾਣੀ ਦਾ ਅੰਮ੍ਰਿਤ-ਰਸ ਭੁੰਚਣਹਾਰੇ ਗੁਰ ਭਾਈ ਭੈਣਾਂ ਤਲਵਾੜਾ ਜੀ ਦੀ ਇਸ ਅਨਮੋਲ ਕੋਸ਼ਿਸ਼ ਤੋਂ ਜਰੂਰ ਲਾਹਾ ਲੈਣਗੇ ਜੀ।
ਗੁਰੂ ਚਰਨਾਂ ਦੇ ਭੌਰਿਆਂ ਦਾ ਦਾਸ,ਜਸਜੀਤ ਸਿੰਘ