Loved Heera Singh jee's original line ਦੇਖੀ ਸੱਜਣਾ ਇੰਜ ਨਾ ਕਰਾਵੀਂ and came up with this poem.
ਦੇਖੀਂ ਸਜਣਾ ਕਿਤੇ ਇੰਜ ਨਾ ਕਰਾਵੀਂ।
ਬਾਂਹ ਫੜ ਕੇ ਸਜਣਾ ਛੱਡ ਨਾ ਜਾਵੀਂ।
ਬਹੁਤ ਜਨਮਾਂ ਦੀ ਭਟਕਦੀ ਤੱਤੜੀ,
ਆਈ ਤੇਰੀ ਸਰਣ, ਤੂੰ ਸਰਣ ਰਖਾਵੀਂ।
ਕੁਰੂਪ, ਕੁਲਖਣੀ, ਢੀਠ ਤੇ ਬੇਸ਼ਰਮ,
ਕੁਬਿਜਾ ਵਾਂਗ ਤੂੰ ਸੋਹਣੀ ਬਣਾਵੀਂ।
ਗਹੀ ਬਾਂਹ ਦੀ ਲਾਜ ਸਦਾ ਰਖਣੀ।
ਆਪਣਾ ਸਚੜਾ ਇਹ ਬਿਰਦ ਰਖਾਵੀਂ।
ਨੀਰ ਬਿਨਾ ਜਿਉਂ ਮੀਨਾ ਮਰਦੀ।
ਆਪਣੀ ਪ੍ਰੀਤਿ ਤੂੰ ਐਸੀ ਲਾਵੀਂ।
ਕਾਸ਼ਟ ਸੰਗਿ ਜਿਉਂ ਲੋਹ ਹੈ ਤਰਦਾ।
ਸ਼ਬਦ ਸੰਗਿ ਤੂੰ ਸਾਨੂੰ ਤਰਾਵੀਂ।
ਮੁੰਦਰੀ ਵਿਚ ਜਿਉਂ ਹੀਰਾ ਸੋਂਹਦਾ।
ਸਾਡੇ ਮਨ 'ਚ ਅਪਨਾ ਨਾਮ ਜੜਾਵੀਂ।
ਦੁਨੀਆ ਦੀ ਸੁਧ ਬੁਧ ਭੁਲ ਜਾਵੇ,
ਇਸ ਤਰਾਂ ਆਪਣਾ ਨਾਮ ਜਪਾਵੀਂ।
ਜਿਹੜੀ ਕਾਰ ਤੈਨੂੰ ਭਾਉਂਦੀ ਸਜਣਾ,
ਓਸੇ ਹੀ ਕਾਰ ਵਿਚ ਸਾਨੂੰ ਲਾਵੀਂ।
ਹੋਰ ਸਹਾਰਾ ਕੋਈ ਨਾ ਸੁਝੇ ਸਜਣਾ,
ਕੁਲਬੀਰ ਸਿੰਘ ਦੀ ਲਾਜ ਰਖਾਵੀਂ।
ਸਤਿਗੁਰਬਚਨਕਮਾਵਣੇਸਚਾਏਹੁਵੀਚਾਰੁ॥