Benti to Saayeen Satguru jee:

ਅਮ੍ਰਿਤ ਦੇ ਭਰੇ ਭੰਡਾਰ ਤੇਰੇ, ਇਕ ਬੂੰਦ ਸਾਨੂੰ ਵੀ ਪਿਲਾ ਸਾਂਈਂ।
ਜਨਮਾਂ ਦਾ ਹਨੇਰਾ ਅੰਦਰ ਹੈ, ਨਾਮ ਲਾਟੂ ਭੀਤਰ ਜਗਾ ਸਾਂਈਂ।
ਦੁਬਿਧਾ ਹੈ ਜੜ੍ਹ ਪੁਆੜੇ ਦੀ, ਸਾਡੀ ਦੁਬਿਧਾ ਹੁਣੇ ਮਿਟਾ ਸਾਂਈਂ।
ਭਗਤੀ ਵਿਚ ਕਈ ਬਿਘਨ ਨੇ, ਇਹ ਸਾਰੇ ਬਿਘਣ ਹਟਾ ਸਾਂਈਂ।
ਨਾਮ ਬਿਨਾਂ ਛੁਟਕਾਰਾ ਨਹੀਂ, ਇਹੋ ਸਚੀ ਕਾਰ ਤੂੰ ਕਰਾ ਸਾਂਈਂ।
ਰਸ ਬਿਨਾਂ ਅਨਰਸ ਨ ਜਾਵੇ, ਤਾਂਹੀ ਹਰਿਰਸ ਸਾਨੂੰ ਦਿਵਾ ਸਾਂਈਂ।
ਬਾਹਰਲੇ ਤੀਰਥ ਬੜੇ ਦੇਖੇ, ਹੁਣ ਅੰਤਰਗਤਿ ਤੀਰਥ ਨਵ੍ਹਾ ਸਾਂਈਂ।
ਕੁਲਬੀਰ ਸਿੰਘ ਤੇਰੀ ਸਰਣ ਰਹੇ, ਇਹੋ ਸਾਡੀ ਬਸ ਦੁਆ ਸਾਂਈਂ।

Ardaas Benti for some Naraaz Sangi Saathi:

ਸਾਡੇ ਸਭ ਮਿਤਰਾਂ ਨੂੰ ਸੁਮੱਤ ਆਵੇ, ਉਹ ਤੇਰੀ ਗੁਰਮਤਿ ਧਾਰਨ ਕਰਨ।
ਜੋ ਭਰਮ ਭੁਲੇਖੇ ਵਿਚ ਫਸ ਗਏ ਨੇ, ਉਹ ਵੈਰ ਵਿਰੋਧ ਨੂੰ ਮਾਰਨ ਕਰਨ।
ਸਭ ਨਾਲ ਪ੍ਰੇਮ ਭਾਵਨੀ ਰੱਖਣ ਤੇ ਨਾ ਉਹ ਡਰਨ ਤੇ ਨਾ ਡਾਰਨ ਕਰਨ।
ਹਮਸਫਰਾਂ ਯਾਰਾਂ ਨੂੰ ਜਿਤਣ ਨਾਲੋਂ, ਉਹ ਸਗੋਂ ਸਵੀਕਾਰ ਹਾਰਨ ਕਰਨ।
ਹਉਮੈ ਨਹੀਂ ਮਿਲਣ ਦਿੰਦੀ ਯਾਰਾਂ, ਇਸ ਹਉਮੈ ਨੂੰ ਅੱਗ'ਚ ਡਾਰਨ ਕਰਨ।
ਯਾਰਾਂ ਨੂੰ ਕੁਬੋਲ ਬੋਲਣੇ ਲਿਖਣੇ, ਇਸ ਤਰਾਂ ਨਾ ਜੀਵਨ ਗੁਜ਼ਾਰਨ ਕਰਨ।
ਜਿਨ੍ਹਾਂ ਯਾਰਾਂ ਨੇ ਨੇਹ ਘਣਾ ਕੀਤਾ, ਵੈਰ ਉਹਨਾਂ ਸੰਗ ਕਿਸ ਕਾਰਨ ਕਰਨ?
ਗੁਰਮਤਿ ਦਾ ਤਕਾਜ਼ਾ ਇਹੋ ਯਾਰੋ, ਸਾਰੇ ਗੁਰਸਿਖ ਨਿਮ੍ਰਤਾ ਧਾਰਨ ਕਰਨ।
ਜੋ ਯਾਰਾਂ ਦੇ ਮੂੰਹ ਤੇ ਮੁੱਕੇ ਮਾਰੇ, ਉਹ ਜੀਵਨ ਆਪਣਾ ਬਿਦਾਰਨ ਕਰਨ।
ਜੋ ਯਾਰਾਂ ਨੂੰ ਧਮਕੀਆਂ ਲਿਖ ਭੇਜਣ, ਐਵੇਂ ਉਹ ਝਖ ਹੀ ਮਾਰਨ ਕਰਨ।
ਯਾਰਾਂ ਨੂੰ ਤਾਂ ਕੈੜੀ ਅੱਖ ਹੀ ਬਹੁਤ, ਧਮਕੀਆਂ ਦਸੋ ਕਿਸ ਕਾਰਨ ਕਰਨ?
ਰਾਹੇ ਰਾਸ ਤੇ ਆਵਣ ਸੰਗੀ ਸਾਥੀ, ਗੁਰਮਤਿ ਦਾ ਲਾਹਾ ਕਮਾਵਨ ਕਰਨ।
ਕੁਲਬੀਰ ਸਿੰਘ ਤੇ ਸਭ ਸੰਗੀ ਸਾਥੀ, ਨ੍ਹਾਵਣ ਵਿਚ ਤਰਨ ਤਾਰਨ ਕਰਨ।

Kulbir Singh

Sep 18, 2012